OFW- Mayaman, Nagmamayaman o Puro Kayabangan

Isa rin akong OFW but I don’t blog about it.Wala kasi akong maisip na topic probably dahil di ko naman naging problema mga kamag anak ko sa Pilipinas, kumbaga,walang mga pasaway at nakatanghod buwan buwan sa sweldo ko, swerte di ba?

Kung gaano kadami ang OFW ay ganun din kadami ang mga  nagrereklamo base sa personal na kwento, mga blog, articles at kung anu ano pang pwedeng pagkwentuhan. Kesyo mga kamag anak sa Pilipinas, wala ng ginawa kundi mag abang ng padala, pati yata si kumpare nakikinabang na rin . Kapapadala pa lang, humihingi na ulit, kasi si pamangkin nakabuntis at kailangan ng pera pampakasal, berdey ni kuya, kakahiya namang di magpainom sa tropa,si pinsan nangungutang ng pambayad sa upa sa bahay kasi limang buwan ng di nakakabayad  at kung anu ano pa.

Ikaw naman sige lang, okay lang, padala halos buong sweldo. Katwiran mo,“pamilya ko naman, kaya nga ako nagtatrabaho para sa kanila.” Feeling tuloy nila pinupulot lang natin ang pera dito. Kaya 'wag ng magtaka kung bakit di ka makaipon dahil sa dami ng pinapadalhan mo. Dagdag padala, dagdag obligasyon, pero sabi mo nga happy ka naman, pero happy ka nga ba?

 Ilang taon ka na ba sa abroad, mahigit 10 taon? before you know it, panot ka na pala at biglang natanggal sa trabaho, me naipon ka na ba? may bahay ka na bang mauuwian sa Pinas? Oo, ngayon masaya kayo, pero hanggang kailan? for sure babalik at babalik ka rin sa Pinas pagdating ng araw. Sana may mauuwian kang  sariling bahay o sapat na ipon. Dahil panigurado ako pag naubos ang ipon, wala kang maasahan sa mga kamag-anak mo.

Marami sa abroad, mahigit 20 taon na pero puro yabang lang ang ipon, inuuna kasi pagrerelax dahil mahirap daw magtrabaho sa mainit na disyerto. Tama nga naman, magrelax tuwing bakasyon, walang masama lalo na at di mo inuutang at ikaw ang gumagastos, may katwiran. Pero taun taon mo ng ginagawa yan ,di ka na ba nagsasawa .Kung ang Facebook  nga nagsasawa na yata  sa pagmumukha mo. Taun taon mo na yatang ginagawa yang create album, post photo, pambihira  teh! di ka ba nauumay sa pagmumukha mo. Bawa’t galaw at subo, nakaabang ang kamera. Kailangan syempre may background na dagat or resort sa likod mo. Syempre naman kailangang ipakita sa mga ka FB para sikat.

Pansinin lang natin, wala yatang picture picture sa sariling bahay. Inuuna pamamasyal at kinalimutan ng magpundar. Sabi nga naman ni nanay, di bale na ubos ang pera, enjoy naman mga bata. Huh! bata nga ba nag eenjoy o ang matatanda? Si nanay talaga  kunsintidor imbes na turuang mag-ipon ang OFW na anak  ay nakikiayon pa.

 Di man lang isiping  habang nag eenjoy ay isabay na ring maghulog buwan buwan ng bahay at lupa or anumang property, kahit maliit basta buwan buwan ay may napupuntahan ang pinaghirapan. Puro ka na lang “saka na muna ipon, next year na lang.” Ilang taon mo na bang dialog yan? Ibahin mo naman kaya ang motto mo, gawin nating “saan kaya pwedeng mag invest ng mga naipon ko.” T'yak balang araw, hindi pa huli ang lahat at makakapagrelax ka rin  sa bunga ng mga pinaghirapan mo.

Hindi mayaman ang OFW- marami lang talagang nagmamayaman lang at inuuna ang yabang. Pero malay naman natin dahil hindi naman natin kilala ang isa't isa, baka naman nag iipon pero secret nga lang. Uy, sana nga, sige isekreto mo na muna.